Kur flasim për blerjen e një apartamenti, vëmendja shpesh përqendrohet te ndërtimet e reja. Fasada moderne, standardet e reja dhe komoditetet bashkëkohore janë faktorë të rëndësishëm, por nuk janë të vetmit që përcaktojnë një investim të mirë. Në shumë raste, një pronë në një pallat ekzistues mund të jetë një alternativë shumë interesante, veçanërisht kur ndodhet në një zonë të konsoliduar, ka një çmim të arsyeshëm dhe ofron perspektivë për të ardhmen.
1. Sepse blen në një zonë të konsoliduar.
Një nga arsyet kryesore për të konsideruar një pronë ne pallat ekzistues është vendndodhja. Në zona të konsoliduara të qytetit, infrastruktura dhe shërbimet janë tashmë të zhvilluara. Blerësi e njeh realisht zonën dhe mund të vlerësojë aksesin, transportin, shërbimet, aktivitetin tregtar dhe kërkesën për banim. Në këtë rast, fakti që pallati nuk është i ri nuk do të thotë domosdoshmërisht se prona ka më pak vlerë. Përkundrazi, një apartament në një ndërtesë ekzistuese, por në një pozicion shumë të mirë urban, mund të jetë një investim me interes të veçantë.
2. Sepse e sheh dhe e vlerëson atë që po blen.
Kur blen një apartament në një pallat ekzistues, ke mundësinë të vlerësosh realisht pronën dhe ndërtesën. Mund të shohësh gjendjen e saj, aksesin, hapësirat e përbashkëta, pozicionin e apartamentit, ndriçimin, orientimin dhe mënyrën se si funksionon ndërtesa në përditshmëri. Kjo e bën procesin e vendimmarrjes më konkret.
3. Sepse mund të blesh në një zonë të mirë me një investim më të kontrolluar.
Në disa raste, një apartament në një pallat ekzistues mund të ketë një çmim më të favorshëm krahasuar me një ndërtim të ri në të njëjtën zonë. Kjo mund t'i japë blerësit mundësinë të hyjë në një zonë ku një pronë e re do të kishte një kosto shumë më të lartë. Por analiza duhet të jetë gjithmonë: Çfarë vlere po marr për çmimin që po paguaj? Jo thjesht ,sa më lirë po e blej.
4. Sepse prona mund të ketë potencial për një zhvillim të ardhshëm.
Ky është një nga aspektet më interesante të një investimi në një pallat ekzistues. Nëse një ndërtesë ndodhet në një zonë me potencial të lartë zhvillimi, mund të ekzistojë, në të ardhmen, mundësia që ajo të zëvendësohet me një objekt të ri. Në një skenar të tillë, pronarët ekzistues mund të kenë mundësi të përfitojnë nga zhvillimi i ri, në varësi të kushteve të marrëveshjes, kuadrit ligjor, parametrave urbanistikë dhe interesit të zhvilluesit. Kjo do të thotë se një apartament që sot ndodhet në një pallat ekzistues mund të ketë një perspektivë tjetër vlere në të ardhmen, nëse ndërtesa përfshihet në një proces të mundshëm rizhvillimi. Sigurisht, kjo nuk është një e drejtë e garantuar dhe as një përfitim automatik. Nuk mund të blihet një pronë me supozimin se patjetër do të ndërtohet një pallat i ri. Por për një investitor afatgjatë, potenciali i ardhshëm i ndërtesës është një faktor që ia vlen të analizohet.
5. Mund të përfitosh nga ndryshimi i standardit të pronës në të ardhmen.
Nëse një ndërtesë ekzistuese zëvendësohet me një objekt të ri, ndryshimi nuk lidhet vetëm me pamjen e jashtme. Një objekt i ri mund të sjellë standarde të tjera ndërtimi, organizim të ri të hapësirave dhe karakteristika të ndryshme të pronës. Për pronarin ekzistues, kjo mund të krijojë një mundësi që prona e sotme të marrë një tjetër vlerë dhe standard në të ardhmen, sipas kushteve konkrete të zhvillimit.
6. Por nuk duhet të blesh vetëm me shpresën e një zhvillimi të ardhshëm.
Ky është elementi që e bën analizën profesionale. Një investitor nuk duhet të blejë një apartament vetëm sepse mendon se pallati do të prishet një ditë. Duhet të ketë vlerë prona edhe nëse një zhvillim i tillë nuk ndodh. Pra, investimi duhet të jetë i arsyeshëm që në momentin e blerjes, ndërsa potenciali i rizhvillimit duhet konsideruar si një mundësi shtesë, jo si garanci.
7. Çfarë duhet të analizojë një blerës?
Përpara se të blejë një pronë në një pallat ekzistues, blerësi duhet të analizojë: vendndodhjen ,çmimin për m² , gjendjen e ndërtesës ,gjendjen dhe karakteristikat e apartamentit ,dokumentacionin juridik ,kërkesën e tregut në zonë ,potencialin e zonës për zhvillim ,mundësinë e një rizhvillimi të ardhshëm të ndërtesës ,kostot që mund të kërkojë rikonstruksioni ose përmirësimi i pronës. Kjo e zhvendos vendimmarrjen nga “i ri apo i vjetër?” drejt pyetjes më të rëndësishme: “A është kjo një pronë e mirë për t'u blerë sot dhe a ka potencial të ruajë ose të rrisë vlerën e saj në të ardhmen?”
Përfundimi
A ia vlen të blesh një pronë në një pallat ekzistues? Në shumë raste, po. Veçanërisht kur prona ndodhet në një zonë të mirë, blihet me një çmim të arsyeshëm dhe ka karakteristika që e bëjnë të kërkuar edhe në tregun aktual. Por ajo që e bën investimin edhe më interesant është perspektiva afatgjatë. Një apartament ekzistues mund të jetë jo vetëm një pronë për t'u përdorur apo investuar sot, por edhe një pronë që mund të përfshihet në një zhvillim të ri në të ardhmen. Prandaj, kur vlerëson një pronë në pallat ekzistues, mos shiko vetëm atë që është sot.Shiko edhe potencialin që mund të ketë nesër.
